ತೀವ್ರ ಹೋರಾಟಕ್ಕೆ ಮಣಿದ ಅಧಿಕಾರಿಗಳು – ರೈತರ ಹೋರಾಟಕ್ಕೆ ಸಂದ ಜಯ.
ಮಾನ್ವಿ ನ.21
ರಾಜ್ಯದಲ್ಲಿ BPT ತಳಿಗೆ ಮಾತ್ರ ಮಾನ್ಯತೆ ಇರುವಾಗ, BP2 ಹೆಸರಿನಲ್ಲಿ ‘ಜನನಿ’ ತಳಿ ಬೀಜಗಳನ್ನು ನೀಡಿ ರೈತರಿಗೆ ಉಂಟಾಗಿರುವ ಅಪಾರ ನಷ್ಟದ ಹಿನ್ನೆಲೆಯಲ್ಲಿ ಹಮ್ಮಿ ಕೊಂಡಿದ್ದ ಪ್ರತಿಭಟನೆಯಲ್ಲಿ ರೈತರ ಹೋರಾಟಕ್ಕೆ ಮೊದಲ ಜಯ ಸಿಕ್ಕಿದೆ.ಹೋರಾಟದ ಒತ್ತಡಕ್ಕೆ ಮಣಿದ ಅಧಿಕಾರಿಗಳು ನೀಲಕಂಠೇಶ್ವರ ಸೀಡ್ಸ್ ಕಂಪನಿಯ ವಿರುದ್ಧ ಅಧಿಕೃತ ದೂರು ದಾಖಲಿಸಿರುವುದನ್ನು ರೈತರು ಸ್ವಾಗತಿಸಿದ್ದಾರೆ.
ಜನಸೇವಾ ಫೌಂಡೇಶನ್ ರಾಜ್ಯಾಧ್ಯಕ್ಷರು ಹಾಗೂ ದಲಿತ ಸೇನೆ ರಾಜ್ಯ ಸಂಘಟನಾ ಕಾರ್ಯದರ್ಶಿ ಡಾ, ಜಾವೀದ್ ಖಾನ್ ಅವರು ಮಾತನಾಡಿ, “ಕಂಪನಿ ಮಾನ್ಯತಾ ಪತ್ರ ಕೇಳಿದಾಗ ಮೌನ, ಪ್ಯಾಕೆಟ್ ತೆರೆಯುವಾಗ ‘ಜನನಿ’ ತಳಿ ಪತ್ತೆ, ಕಟಾವಾದ ಭತ್ತದಲ್ಲಿ ತೂಕ ಖನಿಜ ಗುಣಮಟ್ಟ ಕುಸಿತ ಇವೆಲ್ಲ ಕಂಪನಿಯ ಗಂಭೀರ ಅನಿಯಮಿತತೆ. ಈಗಲೇ ಭತ್ತದ ಮಾದರಿ ಪರೀಕ್ಷೆ ನಡೆಸಿ BP2 ತಳಿಯದ್ದೇ ಎಂದು ವಿಜ್ಞಾನಿಗಳಿಂದ ದೃಢಪಡಿಸ ಬೇಕು. ರೈತರಿಗೆ ತಕ್ಷಣ ಪರಿಹಾರ ಘೋಷಿಸಿ, ಕಂಪನಿ ಮತ್ತು ನಿರ್ಲಕ್ಷ್ಯ ತೋರಿದ ಅಧಿಕಾರಿಗಳ ಮೇಲೆ ಕಠಿಣ ಕ್ರಮ ತೆಗೆದು ಕೊಳ್ಳಬೇಕು,” ಎಂದು ಎಚ್ಚರಿಸಿದರು.
ನಂತರ ಮಾತನಾಡಿದ ಹೋರಾಟಗಾರ ಬಸವರಾಜ ಬಾಗಲವಾಡ ಅವರು, “ಕಳಪೆ ಬೀಜದಿಂದ ಬೆಳೆದ ಬೆಳೆಗಳಲ್ಲಿ ಯಾವುದೇ ಕೀಟಬಾಧೆ ಇಲ್ಲ ಎಂದು ಹೇಳುತ್ತಿರುವ ವಿಜ್ಞಾನಿಗಳು ವಿಜ್ಞಾನಿಗಳು ಅಲ್ಲ ಅಜ್ಞಾನಿಗಳು. ಅಗತ್ಯವಿದ್ದರೆ ಎಲ್ಲಾ ಭತ್ತವನ್ನು ಕೃಷಿ ಇಲಾಖೆಯ ಮುಂದೆ ಸುರಿಯುತ್ತೇವೆ” ಎಂದು ಎಚ್ಚರಿಕೆ ನೀಡಿದರು.
ಕರ್ನಾಟಕ ರಾಜ್ಯ ರೈತ ಸಂಘ ಮತ್ತು ಹಸಿರು ಸೇನೆಯ ರಾಜ್ಯಾಧ್ಯಕ್ಷ ಸಾಜಿದ್ ಹುಸೇನ್ ಅವರು, “ಮಾನ್ವಿ ವಿಧಾನ ಸಭಾ ಕ್ಷೇತ್ರದ ಶಾಸಕರು ತಕ್ಷಣ ಪ್ರತಿಭಟನಾ ಸ್ಥಳಕ್ಕೆ ಬಂದು ಕ್ರಮ ಜರುಗಿಸಬೇಕು” ಎಂದು ಆಗ್ರಹಿಸಿದರು.
ನಂತರ ರೈತ ಹೋರಾಟಗಾರರು ಹೊಳಿಯಾಳಪ್ಪ, ಜನಸೇವಾ ಫೌಂಡೇಶನ್ ರಾಜ್ಯ ಸಂಚಾಲಕ ಬುಡ್ಡಪ್ಪ ನಾಯಕ, ತಾಲೂಕು ಅಧ್ಯಕ್ಷ ತಾಜುದ್ದೀನ್ ಚೀಕಲಪರ್ವಿ ಮಾತನಾಡಿದರು.
ಈ ಸಂದರ್ಭದಲ್ಲಿ ಹೋರಾಟಗಾರರಾದ ಶಂಕರ, ಕಿಶನ್ ರಾವ್, ಶಿವಪ್ಪ ಹರಿಜನ, ಬಾಷಾ ಚೀಕಲಪರ್ವಿ, ಅಯ್ಯಣ್ಣ, ಹುಸೇನ್ ಮಡಿವಾಳ ಸೇರಿದಂತೆ ವಿವಿಧ ಸಂಘಟನೆಗಳ ಪ್ರತಿನಿಧಿಗಳು ಹಾಗೂ ರೈತರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗಿಯಾಗಿದ್ದರು.
ತಾಲೂಕ ವರದಿಗಾರರು ಸಿಹಿ ಕಹಿ ಕನ್ನಡ ದಿನ ಪತ್ರಿಕೆ ಹಾಗೂ ಎಸ್.ಕೆ ನ್ಯೂಸ್ ಕನ್ನಡ ಚಾನಲ್: ಹುಸೇನ್ ಭಾಷಾ ನಕ್ಕುಂದಿ ಮಾನ್ವಿ
