ಶ್ರೀ ವಾಲ್ಮೀಕಿ ಮಹರ್ಷಿ ವೃತ್ತ ಸಂರಕ್ಷಣೆಗಾಗಿ ವಾಲ್ಮೀಕಿ – ಸಮಾಜದ ಮುಖಂಡರ ಒತ್ತಾಯ.

ಮಾನ್ವಿ ನ.20

ಪಟ್ಟಣದ ಶ್ರೀ ವಾಲ್ಮೀಕಿ ಮಹರ್ಷಿ ವೃತ್ತ ಪ್ರದೇಶದಲ್ಲಿ ಕಲ್ಮಲಾ ವೃತ್ತದಿಂದ ಸಿಂಧನೂರಿನ ವರೆಗೆ ನಡೆಯುತ್ತಿರುವ ಚತುಷ್ಪಥ ರಸ್ತೆ ನಿರ್ಮಾಣ ಕಾಮಗಾರಿ ವೇಳೆ, ರಸ್ತೆ ಅಗಲೀಕರಣ ಮತ್ತು ಒಳ ಚರಂಡಿ ಕಾಮಗಾರಿ ಸಂದರ್ಭದಲ್ಲಿ ಶ್ರೀ ವಾಲ್ಮೀಕಿ ಮಹರ್ಷಿಗಳ ಪುತ್ತಳಿಯನ್ನು ರಸ್ತೆ ಮಧ್ಯದ ವೃತ್ತದಲ್ಲಿ ಸಮರ್ಪಕವಾಗಿ ಕೂಡಿಸುವಂತೆ ಕ್ರಮ ಕೈಗೊಳ್ಳಬೇಕೆಂದು ವಾಲ್ಮೀಕಿ ಸಮಾಜದ ನೂರಾರು ಮುಖಂಡರು ಒತ್ತಾಯಿಸಿದರು. ಇದರಿಂದ ಸ್ಥಳದಲ್ಲಿ ಸ್ವಲ್ಪ ಕಾಲ ಬಿಗುವಿನ ವಾತಾವರಣ ನಿರ್ಮಾಣವಾಯಿತು.

ಸ್ಥಳದ ಪರಿಸ್ಥಿತಿ ತಿಳಿದು ಶಾಸಕ ಹಂಪಯ್ಯ ನಾಯಕ ಅಧಿಕಾರಿಗಳೊಂದಿಗೆ ಅಲ್ಲಿಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದರು. ಪಟ್ಟಣದ ರಾಯಚೂರು ಸಿಂಧನೂರು ಮುಖ್ಯ ರಸ್ತೆಯಲ್ಲಿ ಬರುವ ಬಸವ ವೃತ್ತ, ವಾಲ್ಮೀಕಿ ವೃತ್ತ, ಡಾ, ಬಿ.ಆರ್ ಅಂಬೇಡ್ಕರ್ ವೃತ್ತಗಳನ್ನು ಪೂರ್ಣವಾಗಿ ಅಳತೆ ಮಾಡಿ, ಒತ್ತುವರಿ ತೆರವು ಮಾಡಿ, ಮಹನೀಯರ ಮೂರ್ತಿಗಳನ್ನು ಕೂಡಿಸುವ ನಕ್ಷೆ ತಯಾರಿಸಲು ಕರ್ನಾಟಕ ರಸ್ತೆ ಅಭಿವೃದ್ಧಿ ನಿಗಮ ಬಳ್ಳಾರಿ ವೃತ್ತದ ಸಹಾಯಕ ಕಾರ್ಯನಿರ್ವಾಹಕ ಅಭಿಯಂತರ ಮುರುಳಿದರ್, ಪುರಸಭೆ ಮುಖ್ಯಾಧಿಕಾರಿ ಪರಸುರಾಮ್ ದೇವಮಾನೆ, ಲೋಕೋಪಯೋಗಿ ಇಲಾಖೆಯ ಅಧಿಕಾರಿ ಮಕಸೂದ್ ನಾಯ್ಕ್, ಹಾಗೂ ಗುತ್ತಿಗೆದಾರ ಸಂಸ್ಥೆಯ ಅಧಿಕಾರಿಗಳಾದ ವಿವೇಕ್ ಅವರಿಗೆ ಸೂಚನೆ ನೀಡಿದರು.

ಸ್ಥಳದಲ್ಲಿ ಅಹಿತಕರ ಘಟನೆ ನಡೆಯದಂತೆ ಮಾನ್ವಿ ಪೊಲೀಸ್ ಠಾಣೆಯ ಪಿ.ಐ. ಸೋಮಶೇಖರ್ ಎಸ್. ಕೆಂಚರೆಡ್ಡಿ ಹಾಗೂ ಸಿಬ್ಬಂದಿಗಳು ಬೇಕಾದ ಬಂದೋಬಸ್ತ್ ಕೈಗೊಂಡಿದ್ದರು.

ವಾಲ್ಮೀಕಿ ಸಮಾಜದ ಮುಖಂಡರಾದ ಜೆ.ಡಿ.ಎಸ್ ಯುವ ಘಟಕದ ರಾಜ್ಯ ಉಪಾಧ್ಯಕ್ಷ ರಾಜಾ ರಾಮಚಂದ್ರ ನಾಯಕ, ರಾಜಾ ಶ್ಯಾಮಸುಂದರ ನಾಯಕ ವಕೀಲರು, ರಾಜಾ ಸುಭಾಷ್‌ಚಂದ್ರ ನಾಯಕ, ಹನುಮೇಶ ನಾಯಕ (ಸಾದಪುರ್), ಸಿ. ಗುರುನಾಥ ನಾಯಕ ಸೇರಿದಂತೆ ಅನೇಕರು ವೃತ್ತವನ್ನು ರಸ್ತೆ ಮಧ್ಯದಲ್ಲೇ ನಿರ್ಮಿಸಿ, ಶ್ರೀ ವಾಲ್ಮೀಕಿ ಮಹರ್ಷಿಗಳ ಮೂರ್ತಿಯನ್ನು ಕೂಡಿಸುವಂತೆ ಆಗ್ರಹಿಸಿದರು.

ಮುಖಂಡರಾದ ಸೈಯದ್ ಖಾಲಿದ್ ಖಾದ್ರಿ, ಮಲ್ಲೇಶಿ ಜಗಲಿ, ಸತ್ತಾರ್ ಬಂಗ್ಲೇವಾಲೆ, ಹಂಪಯ್ಯ ನಾಯಕ, ನಾಯ್ಡು, ನಾರಾಯಣಸ್ವಾಮಿ, ಬಸವರಾಜ್ ಹಳಿಯಾಳ, ವಿನೋದ್ ಸೇರಿದಂತೆ ನೂರಾರು ವಾಲ್ಮೀಕಿ ಸಮುದಾಯದವರು ಉಪಸ್ಥಿತರಿದ್ದರು.

ತಾಲೂಕ ವರದಿಗಾರರು ಸಿಹಿ ಕಹಿ ಕನ್ನಡ ದಿನ ಪತ್ರಿಕೆ ಹಾಗೂ ಎಸ್.ಕೆ ನ್ಯೂಸ್ ಕನ್ನಡ ಚಾನಲ್: ಹುಸೇನ್ ಭಾಷಾ ನಕ್ಕುಂದಿ ಮಾನ್ವಿ