ಕರಾವಳಿಯ ಹೆಮ್ಮೆ, ಗಿಳಿಯಾರಿನ ಪ್ರತಿಭೆ ಕರ್ನಾಟಕ ರಣಜಿ ತಂಡದಲ್ಲಿ – ಕೋಟ ಮೂಡು ಗಿಳಿಯಾರಿನ ವೇಗಿ ಅಭಿಲಾಷ್ ಶೆಟ್ಟಿಗೆ ಸ್ಥಾನ….!

ಉಡುಪಿ ಅ.11

ಜಿಲ್ಲೆಯ ಕ್ರೀಡಾ ವಲಯಕ್ಕೆ ಇದೊಂದು ಹೆಮ್ಮೆಯ ಮತ್ತು ಪ್ರಮುಖ ಸುದ್ದಿ. ಜಿಲ್ಲೆಯ ಕೋಟ ಮೂಡು ಗಿಳಿಯಾರಿನ ಪ್ರತಿಭಾವಂತ ಎಡಗೈ ವೇಗದ ಬೌಲರ್ ಅಭಿಲಾಷ್ ಶೆಟ್ಟಿ ಅವರು ಪ್ರತಿಷ್ಠಿತ 2025-26 ನೇ. ಸಾಲಿನ ರಣಜಿ ಟ್ರೋಫಿ ಟೂರ್ನಿಗೆ ಕರ್ನಾಟಕ ತಂಡದಲ್ಲಿ ಸ್ಥಾನ ಪಡೆಯುವ ಮೂಲಕ ರಾಜ್ಯ ಮಟ್ಟದಲ್ಲಿ ಗಮನ ಸೆಳೆದಿದ್ದಾರೆ.

27 ವರ್ಷದ ಅಭಿಲಾಷ್ ಶೆಟ್ಟಿ ಅವರು ಕರ್ನಾಟಕ ತಂಡದ ವೇಗದ ಬೌಲಿಂಗ್ ವಿಭಾಗಕ್ಕೆ ಹೊಸ ಬಲ ನೀಡಲಿದ್ದಾರೆ. ಸಾಮಾನ್ಯವಾಗಿ ಎಡಗೈ ವೇಗಿಗಳು ತಂಡದ ಪ್ರಮುಖ ಅಸ್ತ್ರವಾಗಿದ್ದು, ಬಲಗೈ ಬ್ಯಾಟ್ಸ್‌ಮನ್‌ಗಳಿಗೆ ತೊಂದರೆ ನೀಡುವ ಸಾಮರ್ಥ್ಯ ಅಭಿಲಾಷ್‌ರಲ್ಲಿದೆ.

ಗಮನಾರ್ಹ ಪ್ರದರ್ಶನ,

ವೇಗದ ಪ್ರಗತಿಅಭಿಲಾಷ್ ಶೆಟ್ಟಿ ಅವರ ವೃತ್ತಿಪರ ಕ್ರಿಕೆಟ್ ಪ್ರಯಾಣ ಅತ್ಯಂತ ವೇಗವಾಗಿ ಪ್ರಗತಿ ಕಂಡಿದೆ. ಇವರು 2024 ರ ನವೆಂಬರ್ 6 ರಂದು ಬೆಂಗಳೂರಿನಲ್ಲಿ ನಡೆದ ಬಂಗಾಳ ವಿರುದ್ಧದ ಪಂದ್ಯದ ಮೂಲಕ ರಣಜಿ ಟ್ರೋಫಿಗೆ ಪದಾರ್ಪಣೆ ಮಾಡಿದ್ದರು. ಇದು ಕೇವಲ ಒಂದು ವರ್ಷದ ಅವಧಿಯಲ್ಲೇ ರಾಜ್ಯ ತಂಡದಲ್ಲಿ ಅವರ ಸ್ಥಾನ ಭದ್ರಪಡಿಸಿ ಕೊಳ್ಳಲು ಸಹಾಯ ಮಾಡಿದೆ.

ಅವರ ಅಂಕಿ-ಅಂಶಗಳು ಹೀಗಿವೆ:-

ರಣಜಿ ಟ್ರೋಫಿ, ಇದು ವರೆಗೆ ಆಡಿರುವ ಕೇವಲ 2 ರಣಜಿ ಪಂದ್ಯಗಳಲ್ಲಿ 7 ವಿಕೆಟ್‌ಗಳನ್ನು ಕಬಳಿಸುವ ಮೂಲಕ ತಮ್ಮ ಸಾಮರ್ಥ್ಯವನ್ನು ಸಾಬೀತು ಪಡಿಸಿದ್ದಾರೆ.

ಲಿಸ್ಟ್ ಎ (List A) ಪಂದ್ಯಗಳು:-

ಕರ್ನಾಟಕ ಪರ ಆಡಿರುವ 7 ಲಿಸ್ಟ್ ಎ ಪಂದ್ಯಗಳಲ್ಲಿ ಒಟ್ಟು 17 ವಿಕೆಟ್‌ಗಳನ್ನು ಪಡೆದಿರುವ ಅಭಿಲಾಷ್, ಸೀಮಿತ ಓವರ್‌ಗಳ ಕ್ರಿಕೆಟ್‌ನಲ್ಲೂ ಮಿಂಚುವ ಸೂಚನೆ ನೀಡಿದ್ದಾರೆ.ಈ ಭರವಸೆಯ ಯುವ ವೇಗಿ ತಂಡಕ್ಕೆ ಆಯ್ಕೆಯಾಗಿರುವ ಹಿನ್ನೆಲೆಯಲ್ಲಿ, ಕರ್ನಾಟಕ ತಂಡದ ರಣಜಿ ಅಭಿಯಾನವು ಅಕ್ಟೋಬರ್ 15 ರಿಂದ ರಾಜ್‌ಕೋಟ್‌ನಲ್ಲಿ ಸೌರಾಷ್ಟ್ರ ವಿರುದ್ಧದ ಪಂದ್ಯದ ಮೂಲಕ ಆರಂಭವಾಗಲಿದೆ.

ತಂಡದ ಪ್ರಮುಖ ವೇಗಿಗಳ ಸಾಲಿಗೆ ಸೇರ್ಪಡೆ ಗೊಂಡಿರುವ ಅಭಿಲಾಷ್ ಶೆಟ್ಟಿ, ಈ ಸೀಸನ್‌ನಲ್ಲಿ ತಮ್ಮ ಬೌಲಿಂಗ್ ವೈವಿಧ್ಯತೆ ಮತ್ತು ನಿಖರತೆಯ ಮೂಲಕ ತಂಡಕ್ಕೆ ಪ್ರಮುಖ ಗೆಲುವುಗಳನ್ನು ತಂದು ಕೊಡುವ ಭರವಸೆ ಮೂಡಿಸಿದ್ದಾರೆ. ಇಡೀ ರಾಜ್ಯದ ಕ್ರೀಡಾಭಿಮಾನಿಗಳು, ಅದರಲ್ಲೂ ವಿಶೇಷವಾಗಿ ಕರಾವಳಿ ಭಾಗದ ಜನತೆ, ಅಭಿಲಾಷ್ ಅವರ ಯಶಸ್ಸಿಗಾಗಿ ಕಾಯುತ್ತಿದ್ದಾರೆ.

ವರದಿ:ಆರತಿ.ಗಿಳಿಯಾರು.ಉಡುಪಿ