ರಸ್ತೆ ಬದಿಯಲ್ಲಿ ಪತ್ತೆಯಾದ ಮೂರು ತಿಂಗಳ ಶಿಶುವಿಗೆ – ಗ್ರಾಮಸ್ಥರಿಂದ ರಕ್ಷಣೆ.

ದೇವಣಗಾಂವ ಅ.14

ವಿಜಯಪುರ ಜಿಲ್ಲೆಯ ಆಲಮೇಲ ತಾಲೂಕಿನ ದೇವಣಗಾಂವ ಗ್ರಾಮದ ಗುಂದಗಿ ರಸ್ತೆಯಲ್ಲಿರುವ ಕಬ್ಬಿನ ಹೊಲದ ದಂಡೆಯ ಬಳಿ, ಮರದ ಕೆಳಗೆ ಸುಮಾರು ಮೂರು ತಿಂಗಳ ಹಸು ಗೂಸೊಂದನ್ನು ಬಿಟ್ಟು ಹೋಗಿರುವ ಘಟನೆ ಬೆಳಕಿಗೆ ಬಂದಿದೆ.

ರಸ್ತೆಯಲ್ಲಿ ಜನರ ಓಡಾಟ ಹೆಚ್ಚಾಗಿರುವ ಪ್ರದೇಶದಲ್ಲಿ ಮಗು ಪತ್ತೆಯಾಗಿದ್ದು, ಸ್ಥಳೀಯರ ಸಮಯ ಪ್ರಜ್ಞೆ ಮಾನವೀಯತೆ ಹಾಗೂ ಮಕ್ಕಳ ರಕ್ಷಣಾ ಇಲಾಖೆಯ ತ್ವರಿತ ಕ್ರಮದಿಂದ ಮಗುವನ್ನು ಸುರಕ್ಷಿತವಾಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ.

ರಸ್ತೆಯಲ್ಲಿ ಹೋಗುತ್ತಿದ್ದ ಯುವತಿಯ ಸಮಯ ಪ್ರಜ್ಞೆಯಿಂದ ಬೆಳಕಿಗೆ ಬಂದ ಘಟನೆ ದೇವಣಗಾಂವ ಗ್ರಾಮದ ಶಂಕರಲಿಂಗ ಕಲ್ಲಪ್ಪ ಸಿಂಪಿ ಅವರಿಗೆ ಸೇರಿದ ಕಬ್ಬಿನ ಹೊಲದ ದಂಡೆಯ ಸಮೀಪದ ಗುಂದಗಿ ರಸ್ತೆಯ ಬದಿಯಲ್ಲಿ ಮಗುವನ್ನು ಬಿಟ್ಟು ಹೋಗಲಾಗಿತ್ತು ಎನ್ನಲಾಗಿದೆ.

ಇದೇ ರಸ್ತೆಯಲ್ಲಿ ಹತ್ತಿ ಬಿಡಿಸುವ ಕೂಲಿ ಕೆಲಸಕ್ಕೆ ತೆರಳಿದ್ದ ಕಾರ್ಮಿಕರು ಟಂಟಂ ವಾಹನದಲ್ಲಿ ಮರಳಿ ಬರುತ್ತಿದ್ದಾಗ, ಅವರೊಂದಿಗೆ ಪ್ರಯಾಣಿಸುತ್ತಿದ್ದ ಆಯಿಷಾ ಉಸ್ಮಾನ್ ಕಸಾಬ ಎಂಬ ಯುವತಿಗೆ ರಸ್ತೆಯ ಪಕ್ಕದಲ್ಲಿ ಮಗು ಬಿದ್ದಿರುವುದು ಕಾಣಿಸಿದೆ.

ಮಗುವನ್ನು ಕಂಡು ಆತಂಕ ಗೊಂಡ ಯುವತಿ, ವಾಹನ ದಲ್ಲಿದ್ದವರಿಗೆ ತಕ್ಷಣ ವಿಷಯ ತಿಳಿಸಿ ಮಗುವನ್ನು ರಕ್ಷಿಸುವಂತೆ ಮನವಿ ಮಾಡಿದ್ದಾರೆ. ಆರಂಭದಲ್ಲಿ ಕೆಲವರು ಆಕೆಯ ಮಾತನ್ನು ಗಂಭೀರವಾಗಿ ಪರಿಗಣಿಸದಿದ್ದರೂ, ನಂತರ ವಾಹನವನ್ನು ನಿಲ್ಲಿಸಲಾಗಿದೆ.

ಟಂಟಂನಲ್ಲಿದ್ದ ಮುಬೀನ್ ಕಸಾಬ ಮತ್ತು ಸಮೀರ್ ಕಸಾಬ ಎಂಬ ಯುವಕರು ತಕ್ಷಣ ಓಡಿಹೋಗಿ ಅಳುತ್ತಿದ್ದ ಮಗುವನ್ನು ಎತ್ತಿಕೊಂಡು ಸುರಕ್ಷಿತ ಸ್ಥಳಕ್ಕೆ ಕರೆ ತಂದಿದ್ದಾರೆ. ಮಗುವಿಗೆ ಹಾಲುಣಿಸಿ ಆರೈಕೆ ಮಾಡಿದ ಗ್ರಾಮಸ್ಥರು ನಂತರ ಕೂಲಿ ಕಾರ್ಮಿಕರು ಮಗುವನ್ನು ಗ್ರಾಮದೊಳಗೆ ಕರೆ ತಂದಿದ್ದಾರೆ.

ಈ ಸಂದರ್ಭದಲ್ಲಿ ಶರಣಪ್ಪ ಆಸಂಗೀಹಾಳ ಅವರ ಮಗುವಿನ ಆರೈಕೆಗೆ ಮುಂದಾಗಿ, ಮಗುವಿಗೆ ಹಾಲು ಕುಡಿಸಿ ನೋಡಿ ಕೊಳ್ಳುವ ವ್ಯವಸ್ಥೆ ಮಾಡಿದ್ದಾರೆ. ವಿಷಯ ತಿಳಿದ ಗ್ರಾಮಸ್ಥರು ಕೂಡ ಸ್ಥಳಕ್ಕೆ ಆಗಮಿಸಿ ಮಗುವಿನ ಸುರಕ್ಷತೆಯ ಬಗ್ಗೆ ಕಾಳಜಿ ತೋರಿದ್ದಾರೆ.

ಇದೇ ವೇಳೆ ಸೈಪನ್ ಖಾಜೇಸಾಬ ನಾಗಾವಿ ಅವರ ತಾಯಿಯವರು ಮಗುವನ್ನು ತಾತ್ಕಾಲಿಕವಾಗಿ ತಮ್ಮ ಬಳಿ ಇಟ್ಟು ಕೊಂಡು ಜೋಪಾನ ಮಾಡುವುದಾಗಿ ತಿಳಿಸಿ ಮಗುವನ್ನು ಕರೆದು ಕೊಂಡು ಹೋಗಿದ್ದಾರೆ.

ಈ ಸುದ್ದಿ ಗ್ರಾಮದಲ್ಲಿ ಹರಡುತ್ತಿದ್ದಂತೆ ಅನೇಕರು ಮಗುವಿನ ಬಗ್ಗೆ ವಿಚಾರಿಸಲು ಮತ್ತು ಅದರ ಆರೈಕೆಗೆ ಮುಂದಾಗಿದ್ದಾರೆ. ಮಗುವಿನ ಸುರಕ್ಷತೆ ಹಾಗೂ ಮುಂದಿನ ಆರೈಕೆಯ ದೃಷ್ಟಿಯಿಂದ ಗ್ರಾಮಸ್ಥರು ಮಕ್ಕಳ ರಕ್ಷಣಾ ಇಲಾಖೆಗೆ ಮಾಹಿತಿ ನೀಡಿದ್ದಾರೆ.

ಮಕ್ಕಳ ರಕ್ಷಣಾ ಇಲಾಖೆಯಿಂದ ತ್ವರಿತ ಕ್ರಮಮಾಹಿತಿ ಪಡೆದ ಜಿಲ್ಲಾ ಮಕ್ಕಳ ರಕ್ಷಣಾ ಘಟಕದ ಅಧಿಕಾರಿಗಳು, ಮಕ್ಕಳ ಸಹಾಯವಾಣಿ 1098 ಹಾಗೂ ತುರ್ತು ಸಹಾಯವಾಣಿ 112 ಮೂಲಕ ಸಂಬಂಧಪಟ್ಟ ಇಲಾಖೆಗಳ ಗಮನಕ್ಕೆ ವಿಷಯ ತಲುಪಿಸಲಾಗಿದೆ ಎಂದು ತಿಳಿದು ಬಂದಿದೆ.

ನಂತರ ಶಿಶು ಅಭಿವೃದ್ಧಿ ಯೋಜನಾಧಿಕಾರಿಗಳ ಮೂಲಕ ದೇವಣಗಾಂವ ಗ್ರಾಮದ ಅಂಗನವಾಡಿ ಕಾರ್ಯ ಕರ್ತೆಯರಾದ ಸುಜಾತಾ ಸಾಲುಟಗಿ ಮತ್ತು ಈರಮ್ಮ ಪತ್ತಾರ್ ಅವರಿಗೆ ಮಾಹಿತಿ ನೀಡಲಾಗಿದೆ.

ಇಬ್ಬರೂ ಸಿಬ್ಬಂದಿ ಸ್ಥಳಕ್ಕೆ ತೆರಳಿ ಮಗುವನ್ನು ತಮ್ಮ ವಶಕ್ಕೆ ಪಡೆದು ಕೊಂಡಿದ್ದಾರೆ. ಸಿಂದಗಿಯಿಂದ ಆಗಮಿಸಿದ ಹಿರಿಯ ಮೇಲ್ವಿಚಾರಕಿ ಜಯಶ್ರೀ ದೊಡ್ಡಮನಿ ಅವರ ಸಹಕಾರದೊಂದಿಗೆ ಮಗುವನ್ನು ವಿಜಯಪುರ ಜಿಲ್ಲಾ ಸರ್ಕಾರಿ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ.

ಆಸ್ಪತ್ರೆಯಲ್ಲಿ ವೈದ್ಯರು ಮಗುವಿನ ಆರೋಗ್ಯವನ್ನು ಪರಿಶೀಲಿಸಿ, ಹೆಚ್ಚಿನ ನಿಗಾ ಹಾಗೂ ಆರೈಕೆಗಾಗಿ ಎರಡು ದಿನಗಳ ಕಾಲ ಆಸ್ಪತ್ರೆಯಲ್ಲಿಯೇ ಇರಿಸಿ ಕೊಳ್ಳಲು ಸೂಚಿಸಿದ್ದಾರೆ ಎನ್ನಲಾಗಿದೆ. ವೈದ್ಯರ ಪ್ರಕಾರ, ಮಗುವಿನ ವಯಸ್ಸು ಸುಮಾರು ಮೂರು ತಿಂಗಳಾಗಿದೆ.

ಮುಂದಿನ ಆರೈಕೆಗಾಗಿ ಮಗುವನ್ನು ಸರ್ಕಾರದ ಅಧೀನದಲ್ಲಿರುವ ಮಕ್ಕಳ ಆರೈಕೆ ಸಂಸ್ಥೆಗೆ ಒಪ್ಪಿಸುವ ಪ್ರಕ್ರಿಯೆ ಕೈಗೊಳ್ಳಲಾಗಿದೆ ಎಂದು ತಿಳಿದು ಬಂದಿದೆ. ಮಾನವೀಯತೆ ಮೆರೆದ ಯುವಕರಿಗೆ ಹಾಗೂ ಗ್ರಾಮಸ್ಥರಿಗೆ ಅಭಿನಂದನೆ ಸಲ್ಲಿಸಿದರು ಎಂದು ವರದಿಯಾಗಿದೆ.

ಈ ಘಟನೆಯಲ್ಲಿ ಮುಖ್ಯವಾಗಿ ಮಗುವನ್ನು ಮೊದಲು ಗಮನಿಸಿ ವಿಷಯ ತಿಳಿಸಿದ ಆಯಿಷಾ ಉಸ್ಮಾನ್ ಕಸಾಬ ಅವರ ಸಮಯ ಪ್ರಜ್ಞೆ ಪ್ರಶಂಸನೀಯವಾಗಿದೆ. ತಕ್ಷಣ ಧಾವಿಸಿ ಮಗುವನ್ನು ಎತ್ತಿಕೊಂಡ ಮುಬೀನ್ ಕಸಾಬ ಮತ್ತು ಸಮೀರ್ ಕಸಾಬ ಅವರ ಕಾರ್ಯವೂ ಮೆಚ್ಚುಗೆಗೆ ಪಾತ್ರವಾಗಿದೆ.

ಅದೇ ರೀತಿ ಮಗುವಿಗೆ ಹಾಲುಣಿಸಿ ಆರೈಕೆ ಮಾಡಿದ ಶರಣಪ್ಪ ಆಸಂಗೀಹಾಳ ಅವರ ಮಗ, ಮಗುವನ್ನು ಜೋಪಾನವಾಗಿ ನೋಡಿ ಕೊಳ್ಳಲು ಮುಂದಾದ ಸೈಪನ್ ಖಾಜೇಸಾಬ ನಾಗಾವಿ ಅವರ ಕುಟುಂಬದವರು, ಸಹಕರಿಸಿದ ಕೂಲಿ ಕಾರ್ಮಿಕರು, ಗ್ರಾಮಸ್ಥರು, ಅಂಗನವಾಡಿ ಸಿಬ್ಬಂದಿ ಹಾಗೂ ಮಕ್ಕಳ ರಕ್ಷಣಾ ಇಲಾಖೆಯ ಅಧಿಕಾರಿಗಳ ಕಾರ್ಯ ಶ್ಲಾಘನೀಯವಾಗಿದೆ.

ರಸ್ತೆಯ ಪಕ್ಕದಲ್ಲಿ ಅಸಹಾಯಕ ಸ್ಥಿತಿಯಲ್ಲಿ ಕಂಡು ಬಂದ ಮಗುವನ್ನು ನಿರ್ಲಕ್ಷಿಸದೆ, ಅದರ ಜೀವ ಮತ್ತು ಭವಿಷ್ಯದ ಬಗ್ಗೆ ಕಾಳಜಿ ವಹಿಸಿರುವುದು ಸಮಾಜಕ್ಕೆ ಉತ್ತಮ ಸಂದೇಶ ನೀಡಿದೆ. ಮಗುವನ್ನು ತ್ಯಜಿಸುವ ಬದಲು ಸುರಕ್ಷಿತ ಮಾರ್ಗವನ್ನು ಆರಿಸೋಣ ಮೂರು ತಿಂಗಳ ಹಸು ಗೂಸನ್ನು ರಸ್ತೆ ಬದಿಯಲ್ಲಿ ಬಿಟ್ಟು ಹೋಗಲು ಕಾರಣವೇನು ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.

ಮಗುವಿನ ತಾಯಿ ಅಥವಾ ಕುಟುಂಬದ ಪರಿಸ್ಥಿತಿಯ ಬಗ್ಗೆ ಯಾವುದೇ ಖಚಿತ ಮಾಹಿತಿ ಲಭ್ಯವಿಲ್ಲದ ಕಾರಣ, ಈ ಕುರಿತು ಊಹಾ ಪೋಹಗಳಿಗೆ ಅವಕಾಶ ನೀಡಬಾರದು. ಮಗುವನ್ನು ಬಿಟ್ಟು ಹೋದವರ ಬಗ್ಗೆ ಸಂಬಂಧಪಟ್ಟ ಅಧಿಕಾರಿಗಳು ಪರಿಶೀಲನೆ ನಡೆಸುವುದು ಅಗತ್ಯವಾಗಿದೆ.

ಕೆಲವೊಮ್ಮೆ ಕೌಟುಂಬಿಕ ಸಮಸ್ಯೆಗಳು, ಆರ್ಥಿಕ ಸಂಕಷ್ಟಗಳು ಅಥವಾ ಇತರ ಅನಿವಾರ್ಯ ಪರಿಸ್ಥಿತಿಗಳು ಕುಟುಂಬಗಳನ್ನು ಕಠಿಣ ನಿರ್ಧಾರಗಳತ್ತ ತಳ್ಳಬಹುದು. ಆದರೆ ಯಾವುದೇ ಕಾರಣಕ್ಕೂ ಹಸು ಗೂಸನ್ನು ರಸ್ತೆ ಬದಿಯಲ್ಲಿ ಅಥವಾ ನಿರ್ಜನ ಪ್ರದೇಶದಲ್ಲಿ ಬಿಟ್ಟು ಹೋಗುವುದು ಮಗುವಿನ ಜೀವಕ್ಕೆ ಅಪಾಯ ವನ್ನುಂಟು ಮಾಡಬಹುದು.

ಮಗುವನ್ನು ಸಾಕಲು ಸಾಧ್ಯವಾಗದಂತಹ ಅನಿವಾರ್ಯ ಪರಿಸ್ಥಿತಿ ಎದುರಾದರೆ, ರಸ್ತೆ ಬದಿಯಲ್ಲಿ ಬಿಟ್ಟು ಹೋಗುವ ಬದಲು ಮಕ್ಕಳ ರಕ್ಷಣಾ ಘಟಕ, ಮಕ್ಕಳ ಸಹಾಯವಾಣಿ 1098 ಅಥವಾ ಸಂಬಂಧಪಟ್ಟ ಸರ್ಕಾರಿ ಇಲಾಖೆಯನ್ನು ಸಂಪರ್ಕಿಸ ಬೇಕು.

ಕಾನೂನು ಬದ್ಧ ದತ್ತು ಮತ್ತು ಮಕ್ಕಳ ರಕ್ಷಣೆಗೆ ಸರ್ಕಾರದ ವ್ಯವಸ್ಥೆಗಳಿವೆ. ಸಮಾಜಕ್ಕೆ ದೇವಣಗಾಂವ ಗ್ರಾಮದ ಸಂದೇಶ ದೇವಣಗಾಂವ ಗ್ರಾಮದಲ್ಲಿ ನಡೆದ ಈ ಘಟನೆ ಮಾನವೀಯತೆ ಇನ್ನೂ ಜೀವಂತವಾಗಿದೆ ಎಂಬುದನ್ನು ತೋರಿಸುತ್ತದೆ.

ಒಬ್ಬ ಯುವತಿ ಮಗುವನ್ನು ಗಮನಿಸಿ ಮಾಹಿತಿ ನೀಡಿದಳು, ಇಬ್ಬರು ಯುವಕರು ಓಡಿ ಹೋಗಿ ಮಗುವನ್ನು ಎತ್ತಿ ಕೊಂಡರು, ಗ್ರಾಮಸ್ಥರು ಆರೈಕೆಗೆ ಮುಂದಾದರು ಮತ್ತು ಅಧಿಕಾರಿಗಳು ಮಗುವನ್ನು ಸುರಕ್ಷಿತವಾಗಿ ಆಸ್ಪತ್ರೆಗೆ ತಲುಪಿಸಿದರು.

ಒಂದು ಮಗುವಿನ ಜೀವ ಉಳಿಸುವಲ್ಲಿ ಅನೇಕ ಕೈಗಳು ಒಂದಾಗಿ ಕೆಲಸ ಮಾಡಿವೆ. ಇಂತಹ ಘಟನೆಗಳು ಸಮಾಜದಲ್ಲಿ ಪರಸ್ಪರ ಸಹಕಾರ, ಕರುಣೆ ಮತ್ತು ಜವಾಬ್ದಾರಿಯ ಮನೋಭಾವವನ್ನು ಬೆಳೆಸುತ್ತವೆ.

ಮಗುವಿನ ಸುರಕ್ಷತೆ ನಮ್ಮೆಲ್ಲರ ಜವಾಬ್ದಾರಿ. ಮಕ್ಕಳನ್ನು ತ್ಯಜಿಸ ಬೇಡಿ, ಮಕ್ಕಳನ್ನು ನಿರ್ಲಕ್ಷಿಸ ಬೇಡಿ ಸಂಕಷ್ಟದಲ್ಲಿರುವ ಮಕ್ಕಳ ರಕ್ಷಣೆಗೆ ಮುಂದಾಗಿ.ದೇವಣಗಾಂವ ಗ್ರಾಮದಲ್ಲಿ ಮಾನವೀಯತೆ ಮೆರೆದ ಎಲ್ಲರಿಗೂ ಹೃತ್ಪೂರ್ವಕ ಅಭಿನಂದನೆಗಳು.

ತಾಲೂಕ ವರದಿಗಾರರು ಸಿಹಿ ಕಹಿ ಕನ್ನಡ ದಿನ ಪತ್ರಿಕೆ ಹಾಗೂ ಎಸ್.ಕೆ ನ್ಯೂಸ್ ಕನ್ನಡ ಚಾನಲ್: ಗಾಲಿಬಸಾಹೇಬ ನಾಗಾವಿ ದೇವಣಗಾಂವ